ຫ້ອງການ ກຕສ ຝຶກອົບຮົມສ້າງຄວາມເຂັ້ມແຂງ ການຫັນເປັນທັນສະໄໝ ວຽກງານບໍລິຫານເອກະສານ ໃຫ້ແກ່ ພຕສ ພາກກາງ ແລະ ພາກໃຕ້

15/12/2022

ຫ້ອງການ ກຕສ ຝຶກອົບຮົມສ້າງຄວາມເຂັ້ມແຂງ ການຫັນເປັນທັນສະໄໝ ວຽກງານບໍລິຫານເອກະສານ ໃຫ້ແກ່ ພຕສ ພາກກາງ ແລະ ພາກໃຕ້

       ໃນຕອນເຊົ້າຂອງວັນທີ 12 ທັນວາ 2022, ທີ່ຫ້ອງປະຊຸມຂອງ ພະແນກເຕັກໂນໂລຊີ ແລະ ການສື່ສານ (ພຕສ) ແຂວງ ຈໍາປາສັກ ໄດ້ມີພິທີເປີດຝຶກອົບຮົມ ສ້າງຄວາມເຂັ້ມແຂງການຫັນເປັນທັນສະໄໝວຽກງານບໍລິຫານເອກະສານ ຂອງ ຂະແໜງເຕັກໂນໂລຊີ ແລະ ການສື່ສານ ຊຶ່ງຈັດໂດຍ ຫ້ອງການ ກະຊວງເຕັກໂນໂລຊີ ແລະ ການສື່ສານ (ກຕສ), ໃຫ້ກຽດເປັນປະທານໂດຍ ທ່ານ ພູຂົງ ຈິດຮູບໂລກ, ຄະນະປະຈໍາພັກກະຊວງ, ຫົວໜ້າຫ້ອງການ ກະຊວງເຕັກໂນໂລຊີ ແລະ ການສື່ສານ, ມີ ທ່ານ ວິໄລ ແກ້ວມະນີໄລ ກໍາມະການພັກແຂວງ, ຫົວໜ້າພະແນກເຕັກໂນໂລຊີ ແລະ ການສື່ສານ ແຂວງ ຈໍາປາສັກ, ມີບັນດາຫົວໜ້າພະແນກ, ຄະນະພະແນກ, ຫົວໜ້າ/ຮອງຫົວໜ້າຂະແໜງ ພ້ອມດ້ວຍວິຊາການ ຈາກ ພຕສ ພາກກາງ ແລະ ພາກໃຕ້ ປະກອບມີ: ພຕສ ນະຄອນຫຼວງວຽງຈັນ, ແຂວງ ບໍລິຄໍາໄຊ, ໄຊສົມບູນ, ຄໍາມ່ວນ, ສະຫວັນນະເຂດ, ສາລະວັນ, ເຊກອງ, ຈໍາປາສັກ ແລະ ອັດຕະປື ລວມຈໍານວນທັງໝົດ 40 ກວ່າທ່ານ.

           ໃນໂອກາດກ່າວເປີດຝຶກອົບຮົມ, ທ່ານ ພູຂົງ ຈິດຮູບໂລກ ໄດ້ກ່າວວ່າ: ໃນໄລຍະຜ່ານມາ, ກະຊວງເຕັກໂນໂລຊີ ແລະ ການສື່ສານ ໄດ້ສຸມໃສ່ການພັດທະນາໂຄງລ່າງພື້ນຖານທາງດ້ານໄອຊີທີທີ່ສຳຄັນ ເພື່ອສະໜອງຮັບໃຊ້ໃຫ້ແກ່ ອົງການຈັດຕັ້ງລັດ ແລະ ສັງຄົມໄດ້ນຳໃຊ້, ພ້ອມກັນນັ້ນ ກໍໄດ້ຄົ້ນຄວ້າສ້າງບັນດານະໂຍບາຍ, ກົດໝາຍ ແລະ ນິຕິກຳລຸ່ມກົດໝາຍຫຼາຍສະບັບ ໂດຍສະເພາະແມ່ນ ວິໄສທັດການພັດທະນາເສດຖະກິດດິຈິຕ໋ອນແຫ່ງຊາດ ໄລຍະ 20 ປີ (2021-2040), ຍຸດທະສາດການພັດທະນາເສດຖະກິດດິຈິຕ໋ອນ ແຫ່ງຊາດ ໄລຍະ 10 ປີ (2021-2030) ແລະ ແຜນພັດທະນາ ເສດຖະກິດດິຈິຕ໋ອນ ແຫ່ງຊາດ ໄລຍະ 5 ປີ (2021-2025), ບັນດາກົດໝາຍ ແລະ ນິຕິກຳ ຂອງກະຊວງ ກ່ຽວກັບວຽກງານດິຈິຕ໋ອນ ຊຶ່ງລ້ວນແຕ່ເປັນເຄື່ອງມືສຳຄັນ ໃຫ້ແກ່ການຫັນການຄຸ້ມຄອງລັດໃຫ້ເປັນທັນສະໄໝ. ທ່ານກ່າວຕື່ມວ່າ: ເພື່ອຜັນຂະຫຍາຍເນື້ອໃນທີ່ກ່າວມາ ຈຳເປັນຕ້ອງໄດ້ພັດທະນາ ແລະ ນຳໃຊ້ ເຕັກໂນໂລຊີໃໝ່ໆ ທີ່ເອີ້ນວ່າ ເຕັກໂນໂລຊີດິຈິຕ໋ອນ ເພື່ອຫັນວຽກງານຕ່າງໆເປັນທັນສະໄໝ ໂດຍສະເພາະ ວຽກງານບໍລິຫານເອກະສານໃຫ້ເປັນທັນສະໄໝ ກໍມີຄວາມຈຳເປັນທີ່ສຸດ ແນ່ໃສ່ການບໍລິຫານ-ການຄຸ້ມຄອງ ແລະ ການບໍລິການລັດ ໃຫ້ມີປະສິດທິພາບ, ສະດວກວ່ອງໄວ, ໂປ່ງໃສ, ປະຢັດ ແລະ ຕອບສະໜອງໄດ້ຕາມຄວາມຕ້ອງການຢູ່ທຸກຂົງເຂດຂອງວຽກງານ.

            ການຝຶກອົບຮົມຄັ້ງນີ້, ຜູ້ເຂົ້າຮ່ວມໄດ້ຮັບຟັງການນໍາສະເໜີບົດ ກ່ຽວກັບ ແຜນພັດທະນາເສດຖະກິດດິຈິຕ໋ອນແຫ່ງຊາດ ຈາກ ທ່ານ ພູຂົງ ຈິດຮູບໂລກ ແລະ ການນໍາສະເໜີບົດຂອງນັກວິທະຍາກອນຈາກຫ້ອງການ ກະຊວງເຕັກໂນໂລຊີ ແລະ ການສື່ສານ ໃນຫຼາກຫຼາຍຫົວຂໍ້ ເປັນຕົ້ນແມ່ນ: ພາລະບົດບາດ ແລະ ໜ້າທີ່ ຂອງ ຫ້ອງການ ກຕສ, ລະບົບບໍລິຫານເອກະສານ E-office ແລະ G-Share, ການຫັນເປັນຫ້ອງການທັນສະໄໝວຽກງານເອກະສານຢູ່ພາຍໃນ ພະແນກເຕັກໂນໂລຊີ ແລະ ການສື່ສານ ແຂວງ, ວຽກງານຮ່ວມມືລົງທຶນ, ວຽກງານພົວພັນປະສານງານກັບຕ່າງປະເທດ, ວຽກງານປະຊາສໍາພັນ ແລະ ວຽກງານນິຕິກໍາ ຂອງ ຂະແໜງເຕັກໂນໂລຊີ ແລະ ການສື່ສານ.

            ການຝຶກອົບຮົມຄັ້ງນີ້ ຈະໄດ້ດໍາເນີນໄປເປັນເວລາ 1 ວັນຈຶ່ງຈະສໍາເລັດ.

            ພາບ ແລະ ຂ່າວ: ບິນລີ້ ສີສຸລາດ.

 

ຄວາມໝາຍຂອງ ກາໝາຍ ກຕສ (LOGO)
ເຟສບຸກ
ວິໄສທັດ, ແຜນຍຸດທະສາດ ແລະ ແຜນການ 10 ປີ (2016-2025)