ພະແນກ ຮ່ວມມືອາຊຽນ
ໜ້າທີ່ຂອງ ພະແນກຮ່ວມມື ອາຊຽນ
ພະແນກຮ່ວມມື ອາຊຽນ ມີໜ້າທີ່ ດັ່ງນີ້:
- ເປັນໃຈກາງໃນການພົວພັນປະສານງານ, ຮ່ວມປຶກສາຫາລື ແລະ ເຈລະຈາວຽກງານຮ່ວມມື ອາຊຽນ ທີ່ກ່ຽວຂ້ອງກັບ ຂະແໜງເຕັກໂນໂລຊີ ແລະ ການສື່ສານ ຕາມການມອບໝາຍຂອງຂັ້ນເທິງ;
- ເປັນເສນາທິການໃນການຄົ້ນຄວ້າການເຂົ້າເປັນພາຄີສັນຍາສາກົນ ພ້ອມທັງຊຸກຍູ້ ຕິດຕາມການປະຕິບັດສັນຍາ, ອະນຸສັນຍາ ແລະ ຂໍ້ຜູກພັນຕ່າງໆດ້ານການຮ່ວມມືທີ່ກ່ຽວຂ້ອງກັບ ຂະແໜງເຕັກໂນໂລຊີ ແລະ ການສື່ສານ;
- ເປັນໃຈກາງປະສານງານ ແລະ ເຄື່ອນໄຫວວຽກງານອາຊຽນ ໃນຂະແໜງເຕັກໂນໂລຊີ ແລະ ການສື່ສານ;
- ປະສານສົມທົບກັບບັນດາ ກົມ/ສູນ/ອົງການ/ສະຖານບັນ ໃນການກະກຽມຮ່າງບົດບັນທຶກຄວາມເຂົ້າໃຈ, ສັນຍາ ແລະ ເອກະສານການຮ່ວມມື ສອງຝ່າຍ ພ້ອມທັງຕິດຕາມກວດກາການຈັດຕັ້ງປະຕິບັດໂຄງການ, ການສະຫຼຸບ ແລະ ແຜນການຕ່າງໆທີ່ໄດ້ຕົກລົງເຫັນດີ ຂອງສອງຝ່າຍ;
- ພົວພັນ, ເຊັນສັນຍາ, ອະນຸສັນຍາ, ຮ່ວມມື, ຍາດແຍ່ງ ການຊ່ວຍເຫຼືອ, ການລົງທຶນຈາກພາຍໃນ ແລະ ຕ່າງປະເທດ ເພື່ອພັດທະນາວຽກງານ ເຕັກໂນໂລຊີ, ນະວັດຕະກຳ,ໂທລະຄົມມະນາຄົມ, ອິນເຕີເນັດ, ໄປສະນີ ແລະຄວາມປອດໄພໄຊເບີ ຂອງ ສປປ ລາວ ບົນພື້ນຖານກົດໝາຍ ແລະ ລະບຽບການທີ່ລັດຖະບານປະກາດໃຊ້ໃນແຕ່ລະໄລຍະ;
- ຄົ້ນຄວ້າເຮັດບົດລາຍງານ ກະກຽມເນື້ອໃນເອກະສານຕ່າງໆ ໃນການເຂົ້າຮ່ວມກອງປະຊຸມ ໃນລະດັບຕ່າງໆຂອງວຽກງານອາຊຽນ ເພື່ອເປັນຂໍ້ມູນໃຫ້ຄະນະນຳກະຊວງ ດ້ານວຽກງານ ຂະແໜງ ເຕັກໂນໂລຊີ ແລະ ການສື່ສານ ເພື່ອຍາດແຍ່ງການຮ່ວມມື ແລະ ການຊວ່ຍເຫຼືອ;
- ຄົ້ນຄວ້າເອກະສານການເຊີນເຂົ້າຮ່ວມກອງປະຊຸມ ສຳມະນາ ຝຶກອົບຮົມ ຢູ່ຕ່າງປະເທດກ່ຽວກັບວຽກງານອາຊຽນ ໃນຂະແໜງ ເຕັກໂນໂລຊີ ແລະ ການສື່ສານ ເພື່ອນຳສະເໜີຄະນະນຳກະຊວງພິຈາລະນາ;
- ຄົ້ນຄວ້າເຮັດບົດລາຍງານຂໍອະນຸມັດຄະນະນຳກະຊວງ ເພື່ອພິຈາລະນາອະນຸມັດໃຫ້ ກົມກອງທີ່ກ່ຽວຂ້ອງ ເປັນເຈົ້າພາບຈັດກອງປະຊຸມສຳມະນາ ໃນຂັ້ນຕ່າງໆ ທີ່ຕິດພັນກັບ ຂະແໜງເຕັກໂນໂລຊີ ແລະ ການສື່ສານ;
- ປະສານສົມທົບກັບພາກສ່ວນທີ່ກ່ຽວຂ້ອງ ອຳນວຍຄວາມສະດວກໃຫ້ຊ່ຽວຊານ, ພະນັກງານ ແລະ ວິຊາການຕ່າງປະເທດ ເພື່ອມາເຄື່ອນໄຫວຕາມສັນຍາກັບ ຂະແໜງເຕັກໂນໂລຊີ ແລະ ການສື່ສານ;
- ຕິດຕາມ ແລະ ປະສານງານການປະກອບພັນທະຕໍ່ວຽກງານຕ່າງໆ ທີ່ຕິດພັນວຽກງານອາຊຽນ ຂະແໜງ ເຕັກໂນໂລຊີ ແລະ ການສື່ສານ ທີ່ ສປປ ລາວ ເປັນສະມາຊິກ ແລະ ດໍາເນີນການຂໍອະນຸມັດປະກອບພັນທະຕາມລະບຽບການ;
- ປະສານສົມທົບກັບພາກສ່ວນກ່ຽວຂ້ອງ ຄົ້ນຄວ້າ, ຕິດຕາມ ແລະ ສະຫຼຸບລາຍງານສະພາບການ ຂອງວຽກງານຮ່ວມມື ອາຊຽນ ແລະ ປະເທດຄູ່ຮ່ວມ, ວຽກເຈລະຈາການຄ້າ ແລະ ວຽກສົ່ງເສີມວິຊາການ ຂອງຂະແໜງເຕັກໂນໂລຊີ ແລະ ການສື່ສານ ໃນແຕ່ລະໄລຍະໃຫ້ຂັ້ນເທິງຮັບຊາບ ຫຼື ພາກສ່ວນກ່ຽວຂ້ອງຕາມການມອບໝາຍ;
- ຈັດກອງປະຊຸມສຳມະນາ ປຶກສາຫາລືດ້ານວິຊາການ ແລະ ເຜີຍແຜ່, ແນະນຳໃນວຽກງານຮ່ວມມື ອາຊຽນ ແລະ ປະເທດຄູ່ຮ່ວມ, ວຽກເຈລະຈາການຄ້າ ແລະ ວຽກສົ່ງເສີມວິຊາການ ຂອງຂະແໜງເຕັກໂນໂລຊີ ແລະ ການສື່ສານ;
- ສະເໜີແຕ່ງຕັ້ງພະນັກງານຂອງພະແນກ ເພື່ອລົງເຄື່ອນໄຫວວຽກງານຕາມຄວາມຮັບຜິດຊອບ;
- ຂຶ້ນແຜນຄວາມຕ້ອງການງົບປະມານ ເພື່ອຮັບໃຊ້ວຽກງານການຮ່ວມມືຂອງພະແນກ;
- ປະຕິບັດໜ້າທີ່ອື່ນໆ ຕາມການມອບໝາຍຂອງຄະນະຫ້ອງການ.
