ພະແນກ ນິຕິກໍາ
ໜ້າທີ່ຂອງ ພະແນກ ນິຕິກໍາ
ພະແນກນິຕິກຳ ມີໜ້າທີ່ ດັ່ງນີ້:
- ຕິດຕາມ, ຊຸກຍູ້ ແລະ ເຂົ້າຮ່ວມ ການຄົ້ນຄວ້າ, ສ້າງ ຫຼື ປັບປຸງ ກົດໝາຍ ແລະ ນິຕິກຳອື່ນ ລວມທັງຮ່າງສັນຍາຂອງຂະແໜງການ ເຕັກໂນໂລຊີ ແລະ ການສືສານ;
- ຄົ້ນຄວ້າປະກອບຄຳເຫັນຕໍ່ຮ່າງກົດໝາຍ, ນິຕິກຳຕ່າງໆ ລວມທັງບັນດາຮ່າງສັນຍາຂອງບັນດາກົມ/ທຽບເທົ່ານຳສະເໜີຄະນະນຳກະຊວງ ພິຈາລະນາຮັບຮອງ;
- ກວດກາຄວາມສອດຄ່ອງກັບລັດຖະທຳມະນູນ, ກົດໝາຍ ແລະ ເຕັກນິກການຮ່າງກົດໝາຍທີ່ສ້າງໃໝ່ ຫຼື ປັບປຸງຮ່າງນິຕິກຳອື່ນ;
- ສັງລວມ ແລະ ກັ່ນຕອງບັນດາບົດລາຍງານ, ບົດສະເໜີຂອງບັນດາກົມ/ທຽບເທົ່າທີ່ກ່ຽວຂ້ອງກັບການສ້າງແລະ ປັບປຸງກົດໝາຍ ແລະ ນິຕິກຳດັ່ງກ່າວ ເພື່ອນຳສະເໜີຄະນະນຳກະຊວງພິຈາລະນາ;
- ກວດກາ, ຮຽບຮຽງ ແລະ ຢັ້ງຢືນຄວາມຖືກຕ້ອງຂອງຮ່າງນິຕິກຳ ກ່ອນນຳສະເໜີຄະນະນຳກະຊວງ;
- ສົມທົບກັບບັນດາກົມ/ທຽບເທົ່າ ໂຄສະນາ ເຜີຍແຜ່ ກົດໝາຍ ແລະ ນິຕິກຳອື່ນຂອງຂະແໜງ ຕສ ພ້ອມທັງສະຫຼຸບ, ປະເມີນຜົນການຈັດຕັ້ງປະຕິບັດບັນດາກົດໝາຍ ແລະ ນິຕິກຳດັ່ງກ່າວ;
- ຕິດຕາມ, ກວດກາ ແລະ ຄົ້ນຄວ້າ ລາຍງານຕໍ່ຄະນະນຳກະຊວງກ່ຽວກັບນິຕິກຳຂອງບັນດາກົມ/ທຽບເທົ່າ, ພະແນກ ຕສ ແຂວງ, ນະຄອນຫຼວງວາງ ອອກທີ່ບໍ່ສອດຄອ່ງກັບແນວທາງ, ແຜນນະໂຍບາຍຂອງພັກ-ລັດ ຫຼື ຂັດກັບລັດຖະທຳມະນູນ, ກົດໝາຍ ແລະ ລະບຽບການອື່ນ ທີ່ປະກາດໃຊ້ກ່ອນແລ້ວ;
- ປະສານສົມທົບກັບບັນດາກົມ/ທຽບເທົ່າ, ພະແນກ ຕສ ແຂວງ, ນະຄອນຫຼວງ ເພື່ອເກັບກຳຂໍ້ມູນ, ສັງລວມ, ຕີລາຄາການຈັດຕັ້ງປະຕິບັດກົດໝາຍ ແລະ ນິຕິກຳ ທີ່ວາງອອກເພື່ອລາຍງານໃຫ້ແກ່ ຄະນະນຳກະຊວງ;
- ຊຸກຍູ້, ຕິດຕາມ ການຄົ້ນຄວ້າສ້າງ ແລະ ປັບປຸງນິຕິກຳຕ່າງໆຂອງບັນດາກົມ/ທຽບເທົ່າ ພາຍໃນກະຊວງ ໃຫ້ທັນກັບເວລາທີ່ກຳນົດ;
- ປະຕິບັດໜ້າທີ່ອື່ນໆ ຕາມການມອບໝາຍຂອງຄະນະຫ້ອງການ.
