ເມື່ອບໍ່ດົນມານີ້, ທ່ານ ນ. ພາວັນນາ ດວງບຸບຜາ, ຮອງຫົວໜ້າຫ້ອງການ, ກະຊວງເຕັກໂນໂລຊີ ແລະ ການສື່ສານ (ຕສ) ພ້ອມດ້ວຍຄະນະ ໄດ້ເຂົ້້າຮ່ວມກອງປະຊຸມເຈົ້າໜ້າທີ່ອາວຸໂສດິຈິຕອນອາຊຽນ ແລະ ສະພາດັດສົມໂທລະຄົມມະນາຄົມອາຊຽນ ແລະ ກອງປະຊຸມກ່ຽວຂ້ອງກັບ ປະເທດຄູ່ຮ່ວມ,  ອົງການໂທລະຄົມມະນາຄົມອາຊີປາຊີຟິກ ແລະ ສະຫະພາບໂທລະຄົມມະນາຄົມສາກົນ ທີ່ຮ່າໂນ້ຍ, ສສ ຫວຽດນາມ ໂດຍການເປັນເຈົ້າພາບຂອງ ສສ ຫວຽດນາມ.

ກອງເລຂາອາຊຽນໄດ້ລາຍງານຜົນສຳເລັດຂອງກອງປະຊຸມເຈົ້າໜ້າທີ່ອາວຸໂສດິຈິຕອນ ອາຊຽນ ຄັ້ງທີ 01 ປະຈຳປິ 2023 (1st ADGSOM-ATRC Leaders‘ Retreat 2023) ທີ່ໄດ້ຈັດຂຶ້ນໃນເດືອນມີນາ 2023 ທີ່ ນະຄອນຫຼວງຈາກາຕ້າ, ປະເທດ ອິນໂດເນເຊຍ ແລະ ທົບທວນຄືນການຜັນຂະຫຍາຍແຜນແມ່ບົດ ດິຈິຕອນ ອາຊຽນ 2025 (ADM 2025) ພ້ອມກັບເປັນການປຶກສາຫາລືບັນຫາທີ່ສຳຄັນຕ່າງໆເພື່ອກະກຽມໃຫ້ກອງປະຊຸມເຈົ້າໜ້າທີ່ອາວຸໂສ ແລະ ກອງປະຊຸມ ລັດຖະມົນຕີ ດິຈິຕອນ ອາຊຽນ.

ບັນດາປະເທດສະມາຊິກອາຊຽນ ໄດ້ລາຍງານຄວາມຄືບໜ້າກິດຈະກຳ ໃນສົກປີ 2023, ມີທັງໝົດ 13 ກິດຈະກຳທີ່ໄດ້ຮັບຮອງ ໃນກອງປະຊຸມ ADGMIN ຄັ້ງທີ 03 ໃນເດືອນ ກຸມພາ 2023 ທີ່ຜ່ານມາ. ໃນນັ້ນ ສປປ ລາວ ໄດ້ຮັບ 02 ກິດຈະກຳ ຄື: 1. ການກຳນົດທາງເລືອກທາງດ້ານນະໂຍບາຍເພື່ອປັບປຸງການດຶງດູດການລົງທຶນ (ກິດຈະກຳດັ້ງກ່າວແມ່ນໄດ້ຖືກອະນຸມັດເຂົ້າໃນແຜນວຽກທີ່ເປັນບູລິມະສິດຂອງເຈົ້າໜ້າທີ່ອາວຸໂສ (ADGSOM-ATRC) ສຳລັບສົກປີ 2023); 2. ການສຶກສາກ່ຽວກັບການກຳນົດຕົວຕົນດິຈິຕອນໃນ ອາຊຽນ (ສປປ ລາວ ໄດ້ສະເໜີເຂົ້າເປັນແຜນວຽກກິດຈະກຳທີ່ເປັນ ບູລິມະສິດຂອງເຈົ້າໜ້າທີ່ອາວຸໂສ (ADGSOM-ATRC) ສຳລັບສົກປີ 2024 ແລະ ສະເໜີເປັນ ແຜນວຽກບູລິມະສິດໃນໄລຍະທີ່ ສປປ ລາວ ຈະເປັນປະທານອາຊຽນ 2024.

ພ້ອມນີ້, ກອງປະຊຸມຍັງໄດ້ປຶກສາຫາລືບັນດາບົດສະເໜີກິດຈະກຳອາຊຽນ ສົກປີ 2024 ຊຶ່ງມີທັງໝົດ 15 ກິດຈະກຳ. ໃນນັ້ນ, ສປປ ລາວ ໄດ້ສະເໜີ 01 ກິດຈະກຳ ຫົວຂໍ້ ‘‘ຄວາມເຂົ້າໃຈກ່ຽວກັບຕົວຂັບເຄື່ອນດິຈິຕອນຂອງການລົງທຶນເຂົ້າໃນອຸດສາຫະກໍາການຜະລິດ ແລະ ການບໍລິການຂອງອາຊຽນ’’ ຊຶ່ງຫົວຂໍ້ນີ້ຈະໄດ້ສະເໜີເຂົ້າເປັນໜຶ່ງໃນເນື້ອໃນສຳຄັນເພື່ອລາຍງານໃນກອງປະຊຸມລັດຖະມົນຕີດີຈິຕອນອາຊຽນ 2024 ທີ່ສິງກະໂປ.

ສຳລັບກອງປະຊຸມຮ່ວມກັບບັນດາປະເທດຄູ່ຮ່ວມ, ອົງການໂທລະຄົມມະນາຄົມ ອາຊີ-ປາຊີຟິກ ແລະ ສະຫະພາບໂທລະຄົມມະນາຄົມສາກົນ ແມ່ນໄດ້ຟັງການລາຍງານການຈັດຕ້ັ້ງປະຕິບັດວຽກງານຮ່ວມມືໄລຍະຜ່ານມາ ພ້ອມທັງສືບຕໍ່ແຜນການຮ່ວມມືໃນຕໍ່ໜ້າ ໂດຍມີບາງເນື້ອໃນພົ້ນເດັ່ນ ເພື່ອປຶກສາຫາລືເຊັ່ນ:

(1)ແຜນການເຊັນບົດບັນທຶກຄວາມເຂົ້າໃຈລະຫວ່າງ ASEAN-ສປ ຈີນ ແລະ ບັນດາແຜນການຮ່ວມມື ໃນສົກປີ 2023-2024 ທີ່ລວມມີແຜນກິດຈະກຳການຮ່ວມມືດ້ານເສດຖະກິດດິຈິຕອນ; (2) ແຜນການສຶບຕໍ່ຊຸກຍູ້ສູນຝຶກອົບຮົມວຽກງານຄວາມປອດໄພທາງໄຊເບີ ຮ່ວມ ລະຫວ່າງ ASEAN-ຍີ່ປຸ່ນ ແລະ ບັນດາແຜນການຮ່ວມມື ໃນປີສະເຫຼີມສະຫຼອງ 50 ປີສາຍພົວພັນ ASEAN-Japan ຂອງຂະແໜງການ; (3)ແຜນການຮ່ວມມື ລະຫວ່າງ ASEAN-ສ.ເກົາຫຼີ ທີ່ມີຫຼາຍກິດຈະກຳ ໂດຍທີ່ ກະຊວງ ຕສ, ສປປ ລາວ ກໍ່ໄດ້ເຂົ້າຮ່ວມຫຼາຍກິດຈະກຳ; (4) ແຜນສຶບຕໍ່ກິດຈະກຳສຳມະນາ, ຝຶກອົບຮົມ ແລະ ສຶກສາ ການສ້າງດັດສະນີດິຈິຕອນ ອາຊຽນ ADIX – ASEAN Digital Index ຮ່ວມກັບ EU;(5) ບັນດາແຜນວຽກບູລິມະສິດ ຂອງ ສະຫະພາບໂທລະຄົມມະນາຄົມສາກົນ ທີ່ລວມມີການສົ່ງເສີມບົດບາດຄວາມສະເໝີພາບ ຍິງ-ຊາຍ ໃນຂະແໜງການ ແລະ ຄຳແນະນຳກ່ຽວກັບການຫັນເປັນດິຈິຕອນ ຂອງພາກລັດ;(6) ຮັບຟັງແຜນການ ຮ່າງແຜນຍຸດທະສາດ ສົກປີ 2024-2026 ຂອງອົງການໂທລະຄົມມະນາຄົມ ອາຊີ-ປາຊີຟິກ ທີ່ ມີ ກະຊວງ ຕສ, ສປປ ລາວ ຕ່າງໜ້າ ເປັນປະທານຄະນະຄົ້ນຄວ້າຂອງຮ່າງແຜນດັ່ງກ່າວ;(7) ພ້ອມກັບ ແຜນການຮ່ວມມື ທາງດ້ານ ດິຈິຕອນ ແລະ ICT ປະຈຳປີ ຮ່ວມກັບ ອິນເດຍ ແລະ ສະຫະລັດ ອາເມລິກາ.

ຂ່າວ​ໂດຍ:    ພະ​ແນກ​ອາ​ຊຽນ, ຫ້ອງການກະຊວງ.